“Ek kry ‘n klein beiteltjie, ek tik hom en hy klink; toe slyp ek hom en ek slyp hom totdat hy klink en blink.” ‘n Versameling ligte musiek wat wissel van ‘n rustige tempo, ‘n jazz-ondertoon to ligte rock.

Die jong kunstenaarspan se Beiteltjie behoort in heelwat mense se smaak te val. Die liedjies handel oor bekende en relatief aktuele onderwerpe soos seksuele frustrasie, date rape, drome, liefde, mishandeling en dan die terugkeer na ‘n mens se wortels. Dit is ‘n kombinasie van ou liedjies en ook heelwat nuwelinge.

Dit bevat gedigte van onder andere Ingrid Jonker, NP van Wyk Louw en ook die wat Herman van den Berg self geskryf het. Met Matthys Maree op die klawers, Juan Oosthuizen (Floors) as kitaarspeler, die twee broers, David en Theo Klassen, onderskeidelik op die dromme en die baskitaar, en Herman van den Berg as kitaarspeler en hoofsanger, maak hulle ‘n gedugte span wat die gehoor meesleur.

Die regie word deur Heidi Edeling behartig. Herman van den Berg is vroeër as Beeld se mees belowende nuwe manlike kunstenaar aangewys. Hy is ook vir ‘n South African Music Award genomineer en het ‘n treffer op KFM gehad. Die produksie se gehalte is baie goed. ‘n Baie sterk en diep einde sorg vir ‘n goeie slot en tikkie stof tot nadenke.